尋找香港舊式交通標誌

對比過一位網友Share畀小編，喺1978年制定嘅<道路交通守則>之後，先知道原來香港嘅交通標誌設計經歷過重大變遷，有好多標誌因為種種原因(譬如話過於累贅)而取消或者微調。當嘗試喺網上搵關於呢啲舊標誌嘅相，並冇任何結果。不過小編就發現喺香港一啲樓齡較高而且仲未重建嘅大型住宅項目，不論公私營，裡面原來仲保存住某啲已經畀政府淘汰咗嘅交通標誌牌。小編估計係因為喺呢啲經大型規劃嘅社區裡面，大部分路段一般歸業主所有(亦即係私家路)，而喺覺得唔影響駕駛者嘅情況下，佢哋一般唔會自找麻煩將舊標誌拆走，就令到舊標誌咁樣保存咗落嚟。

第一張圖喺政府有意重建嘅老舊公共屋邨—華富邨社區裡面拍攝，小編喺一個專為貨車而設嘅泊車處發現到舊標誌，佢依然保留咗舊式中文由右至左嘅書寫格式，而箭嘴夾喺中英文之間，再嚟就係舊款「P」字比起後面嘅新款(同1978年標準類似)下端比較修長、圓角較直、整體線條較幼。睇返當年香港電台拍攝嘅短片<大埔之歌>其中一幕，可以見到舊標誌設計喺八十年代嘅大埔墟仍然存在。另一個標誌就比較新奇，依家佢仲豎立喺香港第一個大型私人住宅項目—美孚新邨一個停車場出口。據網站<香港地方>所講，呢個標誌曾經棟喺每個黃格路口四周，提醒駕駛者要確保冇車喺黃格先好駛過。不過美孚新邨嗰塊牌嘅中文譯法同政府有出入，前者將要睇黃格情況嘅步驟略去，有種催人快啲走嘅感覺 。另外，大家留意吓條柱係黑白相間，呢隻配色喺回歸前都仲應用喺全部交通標誌或者紅綠燈柱上面，依家喺香港基本上已經被滅跡，變成灰色。